Gjykata Speciale ka njoftuar se në rastin Gjykimi Thaçi dhe të tjerët, ZPS-ja ka dorëzuar njoftimin më të fundit lidhur me listën e dëshmitarëve.

Siç është parashikuar më parë, Zyra e Prokurorit të Specializuar (ZPS) njofton për përmbledhjen e listës së dëshmitarëve të saj.

“Me këto ndryshime të mëtejshme, vetëm gjashtë (6) dëshmitarë mbeten për të cilët ende pritet një njoftim ose tregues tjetër i statusit. Kjo do të bëhet, siç është paraqitur më parë, sa më shpejt që të jetë e mundur për të siguruar kohë të mjaftueshme për përgatitje”, thuhet në njoftim.

Gjatë konferencës së fundit për ecurinë e çështjes në çështjen Thaçi dhe të tjerët, ZPS-ja njoftoi se parashikonte të thërriste 11 dëshmitarë në gjykatë në periudhën shkurt-prill të vitit 2025.

Ata gjithashtu deklaruan se përditësimi i tyre i radhës mbi numrin e dëshmitarëve do të bëhet deri më 30 janar.

Ndryshe deri më sot 119 dëshmitarë kanë dhënë dëshmi në gjykatë në këtë çështje gjyqësore. Seanca e ardhshme në këtë çështje gjyqësore është caktuar për të hënën, 10 shkurt, duke filluar në orën 9 paradite./rtk